Još jedna kultna rok grupa je blizu svog rokumentarca. Atomsko sklonište koje smo nedavno gledali u Crnoj Gori bliži se jubileju pola vijeka od nastanka. Osnovani su 1976. godine u legendarnoj Puli, ali i danas, u dosta izmijenjenoj postavi rokaju regionom. Osim pjevača i basiste Bruna Langera, danas su tu gitarista Matija Dadić (unuk nekadašnjeg bubnjara Atomaca) i bubnjar Eric Vojak.
To je samo jedan od povoda za snimanje dokumentarca “Do poslednjeg atoma”, koji ovih dana u Puli pod naslovom “Do posljednjeg atoma” snimaju redatelji i scenaristi Dušan Stojanović i Lazar Stanivuk, koji u svom snimateljskom i redateljskom opusu već imaju pet-šest dokumentaraca, a za snimanja u Puli pomaže im i tonski snimatelj Zlatko Pančić. Koproducenti filma su Milan Rašula i Srpski kulturni centar, piše ovih dana Glas Istre.
Kako je filmska ekipa otkrila za ovaj medij, film će trajati pedesetak minuta, a uz razgovore s članovima Atomskog skloništa i ljudima koji su uvelike označili karijeru i njihov muzički put, rokumentarac će obuhvatiti i snimke sa lokacija gdje su Atomci vježbali, nastupali, družili se…
Kako kaže ekipa biće tu dosta arhivskog materijala, a osim Pule, novi video zapisi su zabilježeni u Novom Sadu i Beogradu.
“Pokušavamo ih okupiti u staroj postavi, da naprave zajednički koncert, možda za obljetničkih 50 godina da nastupe u Novom Sadu, gdje je sve i počelo. Nadamo se tomu, no još uvijek ih nismo nagovorili”, rekao je Dušan Stojanović za Glas Istre.
foto: Tea Tidić