BEAT, supergrupa koja slavi King Crimson iz osamdesetih, najavila je novi koncertni album BEAT LIVE, koji izlazi 26. septembra. Numera “Neal and Jack and Me” već je dostupna za strimovanje.
Ovo izdanje bilježi koncert grupe BEAT održan 2024. godine u Los Anđelesu — prethodno prikazan kao lajvstrim — zajedno sa dodatnim snimcima sa velike sjevernoameričke turneje iz prošle jeseni.
Na turneji su se okupili klasični članovi King Crimsona Adrian Belew i Tony Levin, uz gitarskog virtuoza Stevea Vaia i bubnjara grupe Tool Danny Careya. Ime su preuzeli sa kultnog albuma Beat iz 1982. godine, a BEAT je ponovo oživio stvaralaštvo King Crimsona iz te decenije, fokusirajući se na albume Discipline (1981), pomenuti Beat, i Three of a Perfect Pair (1983).
Adrian Belew je u saopštenju za javnost izjavio: „Izlaziš na binu sa trojicom muzičkih virtuoza, svjetske klase, profesionalcima koji su prošli sve, ali se i dalje zabavljaju svirajući ovu muziku koja je bezvremena i jedinstvena – ništa slično nije napravljeno ni prije ni poslije – a publika zna svaku riječ i toliko je oduševljena da ti energija i ljubav koje ti šalju bukvalno oduzimaju dah. Može li bolje od toga?“
Danny Carey je dodao: „Radujem se svakom nastupu sa Tonyem, Adrianom i Steveom sa uzbuđenjem i divljenjem. Svirati s muzičarima ovog kalibra je ostvarenje sna. Ove pjesme su i zabavne i izazovne, a obećanje inspiracije, izvedbe i iznenađenja me nikad nije iznevjerilo. Jedva čekam da nastavimo!“
BEAT LIVE će biti dostupan u tri izdanja:
- 3 LP vinil set,
- 2 CD/Blu-ray izdanje,
- ograničeno kolekcionarsko izdanje koje sadrži 2 CD/Blu-ray, bonus CD i umjetničku knjigu od 36 strana.